Credit card rules: Credit card holders alert! .. New Rules from July 1st

Credit card rules : క్రెడిట్ కార్డుదారులూ అలర్ట్ ! .. జులై 1 నుంచి కొత్త రూల్స్

 క్రెడిట్‌ కార్డుల (Credit card Rules) విషయంలో ఆర్‌బీఐ (RBI) ఎప్పటికప్పుడు కొత్త నిబంధనలు తీసుకొస్తూనే ఉంటుంది.

కార్డుల వినియోగంలో పారదర్శకత, వినియోగదారుల హక్కులు పరిరక్షించేందుకు గానూ కొన్ని చర్యలు తీసుకుంటూ ఉంటుంది. ఇదే విధంగా ఈ ఏడాది ఏప్రిల్‌లో ఆర్‌బీఐ కొన్ని నిబంధనలు తీసుకొచ్చింది. కార్డు వినియోగదారులతో పాటు, ఆ క్రెడిట్‌ కార్డులను జారీ చేసే బ్యాంకులు, ఎన్‌బీఎఫ్‌సీలకూ ఈ నిబంధనలు వర్తిస్తాయి. ఈ మార్పులు జులై 1 నుంచి అమల్లోకి రానున్నాయి.

క్రెడిట్‌ కార్డు బిల్‌ స్టేట్‌మెంట్‌, ఫిర్యాదుల పరిష్కారం, బిల్లింగ్‌ సైకిల్‌లో మార్పు, క్రెడిట్‌ కార్డు క్లోజింగ్‌కు సంబంధించి రేపటి నుంచి కొన్ని మార్పులు జరగనున్నాయి. అవేంటో తెలుసుకుందాం..

క్రెడిట్‌ స్కోరు, ఆదాయం, సకాలంలో చెల్లింపులు తదితరాల ఆధారంగా కార్డు సంస్థలు క్రెడిట్‌ కార్డు పరిమితిని పెంచుతామని చెబుతుంటాయి. కార్డు రకం మారడం, ఖర్చు చేసేందుకు అనుమతించే మొత్తం పెరగడం లాంటివి ఇందులో ఉండొచ్చు. ఇప్పటివరకూ బ్యాంకులు దీన్ని సొంతంగానే నిర్ణయం తీసుకొని, వినియోగదారులకు ఆ సమాచారాన్ని అందించేవి.

కొన్నిసార్లు అడక్కుండానే పరిమితి పెంచిన కార్డులను పంపిస్తూ ఉండేవి. ఇక నుంచి ఇలా కార్డులు జారీ చేయాలంటే.. తప్పనిసరిగా వినియోగదారుల అనుమతి తీసుకోవాలి. కార్డుదారులకు తెలియకుండా పరిమితిని పెంచి, దానికి ఛార్జీలను విధించేందుకు వీల్లేదు.

ఇలా విధిస్తే.. ఆ మొత్తాన్ని వెనక్కి ఇవ్వడంతోపాటు, ఛార్జీలకు రెట్టింపు మొత్తాన్ని వినియోగదారులకు చెల్లించాల్సి ఉంటుంది. కార్డుదారుడు ఈ విషయంలో ఆర్‌బీఐ అంబుడ్స్‌మన్‌నూ సంప్రదించవచ్చు.

కార్డు వినియోగదారులు కార్డును రద్దు చేసుకోవాలని అనుకుంటే.. బ్యాంకులు ఆ ప్రక్రియను ఏడు రోజుల్లోగా పూర్తి చేయాలి.

లేదా ఎనిమిదో రోజు నుంచి రూ.500ల వరకూ జరిమానా ఉంటుంది. కార్డుదారుడు పైసలతో సహా పూర్తి బిల్లును చెల్లించినప్పుడే కార్డు రద్దు అవుతుంది.

కార్డును ఏడాదిపాటు వినియోగించకుంటే.. దాన్ని రద్దు చేసే అధికారం బ్యాంకులకూ ఉంటుంది. దీనికోసం 30 రోజుల ముందుగా బ్యాంకులు, ఎన్‌బీఎఫ్‌సీలు నోటీసులు ఇవ్వాల్సి ఉంటుంది.

అప్పటికీ వినియోగదారుడు స్పందించకపోతే.. కార్డు రద్దు అవుతుంది. కార్డు చేతికి అందిన 30 రోజుల వరకూ కార్డును యాక్టివేట్‌ చేసుకోకపోతే.. జారీ సంస్థ ఓటీపీ ద్వారా దాన్ని యాక్టివేట్‌ చేసుకోవాలని కోరుతుంది.

అప్పటికీ వినియోగదారుడు స్పందించకపోతే.. ఆ తర్వాత ఏడు రోజుల వ్యవధి తర్వాత కార్డును ఛార్జీలూ విధించకుండానే కార్డును రద్దు చేసే అవకాశం ఉంది.

క్రెడిట్‌ కార్డుకు సంబంధించిన కీలక వివరాలను ఒక పేజీలోనే అందించాలని కొత్త నిబంధనల్లో ఆర్‌బీఐ పేర్కొంది. ఛార్జీలు, బ్యాలెన్స్‌ బదిలీ, చెల్లింపుల ఆలస్యానికి రుసుములు, వివిధ సందర్భాల్లో వర్తించే వడ్డీ రేట్లను ఇందులో తెలియజేయాల్సి ఉంటుంది.

కొత్త ఛార్జీలను విధిస్తే.. వాటి గురించి నెల ముందే వినియోగదారులకు తెలియజేయాలి. కొత్త ఛార్జీల వల్ల కార్డుదారులకు భారం అవుతుంది అనుకుంటే.. వారు ఆ కార్డును స్వాధీనం చేసే హక్కు ఉంటుంది.

కొత్త కార్డు దరఖాస్తును తిరస్కరిస్తే అందుకుగల కారణాలను రాత పూర్వకంగా తెలియజేయాలి. ఉదాహరణకు క్రెడిట్‌ స్కోరు తక్కువగా ఉందని తెలియజేస్తే.. దరఖాస్తుదారు దాన్ని పెంచుకునేందుకు ప్రయత్నించే అవకాశం ఉంది.

కొత్త క్రెడిట్ కార్డు నియమాల ప్రకారం క్రెడిట్ కార్డు హోల్డర్‌ బిల్లింగ్‌ సైకిల్ తేదీలను ఒకసారి మార్చుకోవచ్చు. కార్డు జారీ సంస్థలు..

అన్ని క్రెడిట్ కార్డులకు స్టాండర్డ్ బిల్లింగ్ సైకిల్‌ను అనుమతించవు. కాబట్టి కార్డు జారీ సంస్థ నియమాలను అనుసరించి బిల్లింగ్ సైకిల్ వేరు వేరు కార్డులకు వేర్వేరుగా ఉంటుంది. అందువల్ల కార్డు హోల్డర్లు తమ సౌలభ్యాన్ని అనుసరించి బిల్లింగ్ సైకిల్‌ను ఒకసారి మార్చుకునే వీలు కల్పించాలని ఆర్‌బీఐ కార్డు జారీ సంస్థలను ఆదేశించింది.

ఇకపై క్రెడిట్‌ కార్డుల బిల్‌ స్టేట్‌మెంట్‌ను సత్వరమే పంపించాలని కార్డు జారీ సంస్థలకు ఆర్‌బీఐ సూచించింది. ఆలస్యంగా ఇన్‌వాయిస్‌లు రావడంపై ఫిర్యాదులు వస్తున్నాయని, వీలైనంత త్వరగా బిల్లింగ్‌ స్టేట్‌మెంట్‌ను కార్డుదారులకు పంపించాలని సూచించింది.

చాలామంది క్రెడిట్‌ కార్డు బిల్లులను పూర్తిగా చెల్లించకుండా..

కనీస బాకీ మొత్తాన్ని చెల్లిస్తుంటారు. సాధారణంగా కార్డు బాకీలో ఇది 5 శాతం మేరకు ఉంటుంది. కేవలం కనీస మొత్తం చెల్లిస్తూ ఉండటం వల్ల అధిక వడ్డీ భారం పడుతూ ఉంటుంది. ఈ విషయంలో కార్డు జారీ సంస్థలు వినియోగదారులకు అవగాహన కల్పించాలని ఆర్‌బీఐ సూచించింది.

ప్రతి నెలా కనీస మొత్తాన్నే చెల్లించడం వల్ల బకాయి తీరడానికి కొన్నేళ్లు పడుతుందని బ్యాంకులు బిల్లుపై స్పష్టంగా తెలియజేయాల్సి ఉంటుంది.

క్రెడిట్‌ కార్డు ఎక్కడో పడిపోవడం, దాని ద్వారా అనధీకృత లావాదేవీలు జరిగిన సందర్భంలో నష్టాన్ని భర్తీ చేసేందుకు బీమా పాలసీ తీసుకోవచ్చు. కార్డు సంస్థలు వినియోగదారుల అనుమతితో వీటిని అందించవచ్చు. కార్డు ద్వారా జరిగే మోసపూరిత వ్యవహారాలకు కార్డుదారుడి పాత్ర ఉండదు. కార్డు జారీ చేసే సంస్థలకూ బాధ్యత ఉండదు. దీన్ని బీమా సంస్థలు చూసుకుంటాయి. కార్డు పోయిన మూడు రోజుల్లోగా కార్డుదారుడు ఈ విషయాన్ని బ్యాంకుల దృష్టికి తీసుకురావాలి. అప్పుడే జరిగిన నష్టానికి పరిహారం పొందే హక్కు ఉంటుంది.

Thanks for reading Credit card rules: Credit card holders alert! .. New Rules from July 1st